இதழ் 43
ஜூலை 2012

என் வாழ்வில் நான் குழந்தைகளுக்கு வழங்கியிருக்கும் இடம் மிக முக்கியமானது. எனது வாழ்வில் நீக்கமற நிறைந்திருக்கும் அவர்கள் ஏராளமான பதிவுகளை ஏற்படுத்தி சென்றிருக்கின்றனர். அவர்களில் மிக முக்கியமானவள் என் அண்ணனின் 5 வயது மகள் இனியவள். மிக குறைந்த வார்த்தைகளோடு இயங்கும் அவளது உலகத்தில் எப்போதும் எனக்கு ஈர்ப்புகள் அதிகம். அவளோடு எனக்கு கிடைத்த சில ஈர்ப்புகளை பதிவாக்க முனைந்து பல முறை தோற்றுப் போயிருக்கிறேன். பதிவாக்க முடிந்த சிலதை மட்டும் இங்கே பகிர்ந்து கொள்கிறேன்.

குறிப்பு 13

குழந்தை திரும்ப திருப்ப
தனது இருப்பை உச்சரித்தபடியே
இருக்கிறாள்.
எனது
வேறு வேறு பெயர்களில்
அழைத்தபடி
தனது இருப்பை வரைகிறாள்.
அவள் வரைந்து வைத்த
கிறுக்கல்களின் எல்லா கோடுகளிலும்
தெறித்து விழுகின்றன அவளது இருப்புகள்.
நான்
எனது இருப்பிற்காக தவமிருக்கிறேன்.

குறிப்பு 14

ஒரு நீண்ட துவாலையை
உன் கைகளின்
இரு பக்கம் கட்டிக் கொள்.
உன் கைகளை விரிக்கிற பொழுது
துவாலை அசைய வேண்டும்.
இந்த சன்னலைத் திறந்து கீழே
குதித்துவிடு.
நீ பறக்கலாம்
நான் டிவியில் பார்த்தேன் என்கிறாள்
குழந்தை.

குறிப்பு 15

உறக்கத்தில்
அவளது உதடுகள் அசைந்தபடியே
இருக்கின்றன.
அப்போதும் கூட
விளையாட்டு பொம்மைக்காக
அக்காவோடு சண்டை பிடித்தபடி
இருக்கிறாள்.
அக்கா பொம்மையை விட்டுத்
தர விழித்தெழுந்து பொம்மைத் தேடிக்
கொண்டிருக்கிறாள்.

குறிப்பு 16

நான் மிக கவனமாக
ஒதுங்கி
நடக்க வேண்டியிருக்கிறது.
வீடெங்கும்
நடமாடித் திரிகிறது
அவளது
களிமண் பொம்மைகள்.

வல்லினம் - கலை, இலக்கிய இதழ் | Vallinam - A Magazine For Arts And Literature
© vallinam.com.my | All Rights Reserved. 2012.  |  Designed by CVA | Best View in : Mozilla Firefox |  Best resolution : 1024 X 768