இலங்கை இலக்கியம்; தொடர்கள்; உரையாடல்கள்...

அன்புமிக்க வாசகர்களே. இவ்வருடம் வல்லினத்தில் தொடங்கப்பட்ட பல புதிய தொடர்கள் ஒவ்வொன்றாய் நிறைவு காண்கின்றன. எழுத்தாளர் எம்.ஜி.சுரேஷ் எழுதிய 'அனைத்துக் கோட்பாடுகளும் அனுமானங்களே', யோகியின் 'கட்டங்களில் அமைந்த உலகு' போன்றவை கடந்த மாதத்தோடு நிறைவடைந்தன. அவர்களுக்கு நமது நன்றி. தொடர்ந்து அவர்களின் பங்களிப்பை வல்லினம் இதழில் எதிர்ப்பார்க்கிறோம். அதேபோல இம்மாதத்தில் பாலமுருகனின் 'ஒளிந்து விளையாடும் சினிமாவின் கதைகள்' நிறைவு பெறுகிறது. தொடர்ந்து பாலமுருகன் இலங்கை சிறுகதைகள் குறித்த தனது பார்வையை வல்லினத்தில் தொடராகப் பதிவு செய்வார். அதே போல பூங்குழலியும் தனது 'சுவடுகளில் பதியுமொரு பாதை' தொடரில் இலங்கை கவிதைகள் குறித்து இனி தொடர்ந்து எழுதுவார். நானும் இலங்கை நாவல்கள் குறித்து எழுத முனைந்துள்ளேன்.

மலேசிய மற்றும் இலங்கை இலக்கியவாதிகளிடையே உரையாடல்களை ஏற்படுத்தவும் கருத்து பரிமாற்றம் செய்துகொள்ளவும் ஏற்படுத்தப்படும் எளிய முயற்சி இது. அதே போல இலங்கை எழுத்தாளர்களும் மலேசிய எழுத்துகள் குறித்து தங்கள் பதிவினை எழுதுவதோடு மலேசிய எழுத்துகளை இலங்கையில் அறிமுகம் செய்வார்களாயின் அடுத்த ஓரிரு வருடங்களில் மலேசிய - இலங்கை தமிழ் இலக்கியவாதிகளிடையே ஒரு கலந்துரையாடல் நிகழ்வை ஏற்படுத்தலாம். இதுபோன்ற அறிமுகங்கள் நிகழவேண்டும் என மூன்று ஆண்டுகளுக்கு முன்பே ஆசைபட்டவர் பேராசிரியர் எம்.ஏ.நுஃமான அவர்கள்தான். அதற்கான ஆரம்ப பணிகள் சிலவற்றையும் அவர் மலேசியாவில் இருந்தபோது செய்ய முயன்றார். இந்த முயற்சிகள் அவருக்குச் சமர்பணம். இனி மலேசிய - இலங்கை படைப்பாளிகள் செய்யவேண்டியது ஒன்றுதான். வல்லினத்தில் தொடர்ச்சியாகப் படைப்புகளைப் பங்களிப்புகள் செய்வதன் வழி புதிய எழுத்துகளை இரு சாராரும் தொடர்ந்து வாசிக்கவும் கருத்து பரிமாறவும் வகை செய்ய இயலும். வல்லினம் மூலம் இலங்கை இலக்கியங்களை தொடர்ந்து பதிவு செய்ய விரும்புகிறோம். ஆக்கங்களை ஆவலுடன் எதிர்ப்பார்க்கிறோம்.

இதழ் 34
அக்டோபர் 2011

வல்லினம் - கலை, இலக்கிய இதழ் | Vallinam - A Magazine For Arts And Literature
© vallinam.com.my | All Rights Reserved. 2011.  |  Designed by CVA | Best View in : Mozilla Firefox |  Best resolution : 1024 X 768