ஒருநாள் மூர்த்திகரம்

அமைதியில் சயனித்திருந்த
அந்த சிறிய கோயிலில்
நானும் இருந்தேன்.

என் எதிரே ரௌத்திரமூர்த்தியின்
தாண்டவம்
கண்களின் வெறி
கைகளின் தண்டாயுதங்கள்
கால்களின் இயக்கம் தண்டனை நிமித்தமாய்
முகத்தின் கொப்பளிப்பாய் பெருஞ்சினம்
காற்றிலசையும் சாத்தப்பட்ட ஆடைதான்
ரௌத்திரத்தின் சிலைவடிப்பு என்பதை
சொல்லிக்கொண்டிருந்தது.

நேற்று அலுவலகத்தில்
எனது மேலாளரின் நியாயத்திற்காக
நான் கம்பெனி இயக்குனரிடம்
ரௌத்திரமூர்த்தியாயிருந்தேன்.

ஆதாரங்கள் அத்தாட்சிகள்
மொண்ணை விசாரணைகளுக்கு
திரைவிலக்கும் எல்லா யதார்த்தங்களையும்
அவருக்கு மின்னலஞ்சலில் எழுதியனுப்பினேன்
தவறிழைத்த அவரது கைக்கூலியையும்
தெளிவாகக் காட்டிக்கொடுத்தேன்
இயக்குனர் பின்வாங்கி
எனது மேலாளரின் பணி
மீண்டும் உறுதிப்பட்டது
நான் அதிகப் பிரசங்கியாய் விமர்சிக்கப்பட்டேன்
இயக்குனரால்.
இருப்பினும்
சொருகின கத்தி சொருகினதுதானே
பழைய யதார்த்தம் கலைக்கப்பட்டதுதானே
நடுநிலையாளன் பாவம் வெளிறியதுதானே

இன்று
ரௌத்திரப்பருந்தின் நிழல்விலகி
குளிர்ந்தடங்கி
இந்த ஆளரவமற்ற கோயிலின்
அமைதியில் சயனித்திருக்கிறேன்
நிரந்தரமாய் வடிக்கப்பட்ட
புராண ரௌத்திரமூர்த்தியைப்போலல்லாது
நிஜ ரௌத்திரமூர்த்திகளின் காலம்
ஒரு கடந்து செல்லும் தினமே.

வல்லினம் - கலை, இலக்கிய இதழ் | Vallinam - A Magazine For Arts And Literature
© vallinam.com.my | All Rights Reserved. 2010.  |  Designed by CVA | Best View in : Mozilla Firefox |  Best resolution : 1024 X 768